युक्रेन-रुस युद्ध: युक्रेनको ठूलो बाँधमा रुसी क्षेप्यास्त्र आक्रमण, बाढीको खतरा उच्च

बुधवार काराचुनिभ्स्के जलाशयमा आक्रमण भएपछि राष्ट्रपति भोलोदिमिर जेलेन्स्कीले रुसलाई ‘आतङ्कवादी राज्य’को संज्ञा दिए।

“गैरसैनिकसँग लड्ने तिमीहरू कायर हौ,” बुधवार अबेर सम्बोधन गर्दै जेलेन्स्कीले भने। क्रिभी रिह जेलेन्स्कीको जन्मस्थान पनि हो।

“युद्धमैदानबाट भागेका बदमासहरूले टाढाबाट हानि पुर्‍याउन खोजिरहेका छन्।”

उनको सङ्केत पछिल्ला समयमा युक्रेनको तेज प्रत्याक्रमणमा खासगरी उत्तरपूर्वी खार्किभ क्षेत्रमा मिलेको सफलतातर्फ थियो।

ती प्रत्याक्रमणमा युक्रेनी सेनाले थुप्रै भूभागमा पुन: नियन्त्रण कायम गरेको र रुसी सेना पछाडि हटेको दाबी गरिएको छ।

युक्रेनको सफलताको स्तरबारे गरिएका दाबीको बीबीसीले पुष्टि गर्न सकेको छैन।

आफ्नो सम्बोधनमा जेलेन्स्कीले उक्त जलाशयको कुनै सैन्य महत्त्व नभएको बताए।

सो आक्रमणका कारण सहरमा खानेपानी आपूर्ति प्रभावित भएको छ। रुसले फेब्रुअरी २४ मा युक्रेन अतिक्रमण थाल्नु अघि सो सहरमा ६ लाखभन्दा धेरै जनसङ्ख्या थियो।

मस्कोले क्षेप्यास्त्र आक्रमणबारे टिप्पणी गरेको छैन।

यसअघि रुसी सेनाले ऊर्जा उत्पादन केन्द्रहरूमा आक्रमण गरेको स्वीकार गरेको थियो जसले गर्दा गत सप्ताहान्त पूर्वी युक्रेनका दशौँ लाख मानिसहरू अन्धकारमा बस्नु परेको थियो।

बुधवार बिहान जेलेन्स्कीले हालै युक्रेनले नियन्त्रणमा लिएको इज्यम सहरको भ्रमण गरे।

त्यहाँ उनले प्रत्याक्रमणमा सामेल सैनिकहरूप्रति आभार प्रकट गरे। देशका हरेक सहर तथा गाउँमा युक्रेनी झन्डा फेरि फहराउने उनले वाचा गरे।

युक्रेनी प्रत्याक्रमणको गतिबाट रुसी सेना चकित परेको देखिन्छ। मस्कोका फौज पहिचान लुकाउन आफ्ना सैन्य बर्दी फुकालेर गैरसैनिकसँग मिसिन थालेका विवरण आएका छन्।

खार्किभ क्षेत्रका केही नगरहरूबाट आफ्ना फौज फिर्ता भएको रुसले बताएको छ। तर त्यसलाई फौजको पराजय भएको नभइ पुनर्सङ्गठित हुन लागेको भनेर उसले व्याख्या गरेको छ।

रुसको उक्त दाबीलाई पश्चिमा तथा रुसमै पनि हास्यास्पद मानिएको छ।

किएभका फौज रुसी नियन्त्रणमा रहेका इलाकाहरूमा फर्किन थालेसँगै त्यहाँ रुसले युद्धअपराध गरेका आरोपहरू लाग्न थालेका छन्।

बालाक्लीया नगरका स्थानीयबासिन्दाहरूले त्यहाँ रुसी फौजले नगर प्रहरी कार्यालयमा गैरसैनिकहरूलाई यातना दिने गरेको बीबीसीलाई बताए।

रुसले गैरसैनिकलाई निशानामा नपारेको भन्दै आएको छ।

अझैपनि रुसले युक्रेनको पाँच भागको एक भागमा नियन्त्रण गरिरहेको छ। तर युद्धको सुरुवातमै रुसको कब्जामा पुगेका पूर्वी डन्बास क्षेत्रका नगरहरू समेत अहिले युक्रेनी सेनाको निशानामा परेका छन्।

त्यहाँ पछिल्ला दिनमा चर्को लडाईँ भइरहेका विवरण आएका छन्।

राजधानी किएभसहित उत्तर तथा उत्तरपूर्वका युक्रेनी सहर कब्जा गर्न विफल भएपछि मस्कोले डन्बास क्षेत्रमा ध्यान केन्द्रित गरेको बताएको थियो। उक्त क्षेत्रका केही भाग त रुसी अतिक्रमण पूर्व नै रुस समर्थित विद्रोहीहरूको नियन्त्रणमा थिए।

सोमवार क्रेम्लिनले उसको सैन्य कारबाही सुरुमा तय गरिएका सबै उद्देश्य प्राप्ति नभएसम्म जारी रहने बताएको छ।

दक्षिणको खेअरसन क्षेत्रमा छुट्टै युक्रेनी प्रत्याक्रमण कारबाही जारी छन्।